2025 թ. հունիսի 11-ին Փարիզում անցկացվեց արդյունավետ ցանցային միջոցառում, որը համախմբեց տեխնոլոգիաների, նորարարության և ներդրումների ոլորտի առաջատար ֆրանսահայ գործիչներին, հայկական ստարտափներին, ինչպես նաև նշանավոր ֆրանսիացի փորձագետների։ Որպես անկախ իրադարձություն «VivaTech 2025»-ի շաբաթվա ընթացքում՝ այս միջոցառումը նոր միջսահմանային համագործակցություններ խթանելու և հայկական սփյուռքի դերը նորարարության առաջմղման գործում ընդգծելու կենսունակ հարթակ դարձավ։
«Էկոհամակարգերի միավորում. սփյուռքը որպես ֆրանսա-հայկական տեխնոլոգիական համագործակցության խթանիչ» խորագիրը կրող այս հանդիպումը կազմակերպվել էր «EU4Innovation East» ծրագրի կողմից, ընդգծելով կազմակերպության առաքելությունը՝ կապեր ստեղծել Արևելյան գործընկերության ստարտափ էկոհամակարգերի և Եվրոպայի առաջատար նորարարական կենտրոնների միջև:
Միջոցառումը վարում էր «EU4Innovation East» ծրագրի տնօրեն Ժուլիեն Շմիթը, իսկ բացմանը ողջույնի խոսքով հանդես եկան պատվավոր ներկայացուցիչներ.
• Կասիլդ Բրենիերը՝ «Expertise France»-ի՝ գործառնությունների գծով փոխտնօրենը բարձր գնահատեց Հայաստանի տեխնոլոգիական էկոհամակարգի աճը և ընդգծեց եվրոպական նորարարական ցանցերի, մասնավորապես Ֆրանսիայի հետ կապերը խորացնելու կարևորությունը։
• Գայանե Մանուկյանը՝ Ֆրանսիայում ՀՀ դեսպանության առաջին քարտուղարը, անդրադարձավ հայ-ֆրանսիական երկկողմ հարաբերությունների ամրապնդմանը։
• Թիբո Շարլեն` ԵՀ ընդլայնման և Արևելյան հարևանության գլխավոր տնօրինության ծրագրի ղեկավարը, ընդգծեց ԵՀ հանձնառությունը միջսահմանային նորարարությանն ուղղված նախաձեռնություններին։
• Ֆլորանս Պրովանդիեն՝ Ֆրանսիայի՝ Եվրոպայի և արտաքին գործերի նախարարության հայ-ֆրանսիական համագործակցության համակարգողը, խոսեց երկու երկրների միջև ձևավորվող կապերի մասին և հետագա զարգացմանն աջակցելու պատրաստակամություն հայտնեց։
Ծրագրում ընդգրկված էին մի շարք ուշագրավ զեկույցներ, այդ թվում՝
–Հայաստանի ներդրումային միջավայրի և բարձր տեխնոլոգիաների պոտենցիալի վերաբերյալ ընդհանուր ակնարկ, որը ներկայացրեց «Enterprise Armenia»-ի ներդրումների խթանման և արտաքին կապերի ղեկավար Սաթենիկ Ադամյանը։ Նա շեշտեց կազմակերպության դերը՝ Հայաստանը որպես ներդրումային ուղղություն առաջ մղելու գործում, ինչպես նաև անդրադարձավ «VivaTech 2025»-ին Բարձր տեխնոլոգիական արդյունաբերության նախարարության հետ միասին հայկական ազգային տաղավարի կազմակերպմանը։
– Անդրադարձ գալիք միջոցառումներին և գործընկերություններին
● «SSS 2025 – Talent Generation Track»՝ «EU4Innovation East»-ի հետ համատեղ նախագիծ, որը ներկայացվեց «Seaside Startup Summit»-ի՝ ստարտափ էկոհամակարգերի համակարգող Վարդան Գալստյանի կողմից։
● Դարպաս դեպի Եվրոպա կոնգրեսը ներկայացրեց Ռուբեն Օսիպյանը՝ Գիտության և տեխնոլոգիաների հրեշտակների ցանցի (STAN) տնօրենը։ Եվրոպական բիզնես հրեշտակների ցանցի (EBAN), ՀՀ էկոնոմիկայի նախարարության և «EU4IE»-ի հետ կազմակերպված այս կոնգրեսը նպատակ ունի խթանել Հայաստանի մուտքը եվրոպական ներդրումային շուկա։
● «DigiTec 2025»՝ տարածաշրջանի առաջատար տեխնոլոգիական ցուցահանդեսը Հայաստանում, որը ներկայացվեց Սարգիս Կարապետյանի՝ Առաջատար տեխնոլոգիաների ձեռնարկությունների միության (UATE) գործադիր տնօրենի կողմից։
– Հնչեցին տպավորիչ փիչեր, որոնց ընթացքում ներկայացվեցին «Viva Technology 2025»-ին մասնակցած վեց ստարտափները՝ «Burnwe», «Hirebee.ai», «Meluvis», «Metric», «NABIX Technologies» և «VOLO»։
Այս միջոցառումն իրականացվեց «EU4Innovation East» ծրագրի, Ֆրանսիայում Հայաստանի դեսպանության, Երևանում Ֆրանսիայի դեսպանության, Ֆրանսիայի՝ Եվրոպայի և արտաքին գործերի նախարարության ու ֆրանսահայ համայնքի համատեղ ջանքերով։
Էկոհամակարգերի համատեղման այս նախաձեռնությունը վառ օրինակ է, թե ինչպես սփյուռքի կապերն ու համատեղ նպատակները կարող են ձևավորել եվրոպական տեխնոհամագործակցության ապագան։
