საქართველო მდებარეობს ევროპისა და აზიის გზაგასაყარზე, რაც მას რეგიონში სტრატეგიულ მდებარეობას ანიჭებს. ქვეყანა კრიტიკულ სატრანზიტო და დამაკავშირებელ კვანძს წარმოადგენს კონტინენტის ქვეყნებს შორის, რომელიც ხელს უწყობს საერთაშორისო ვაჭრობას და გადაზიდვებს.
საქართველოში ბიზნეს-მეგობრული გარემო მყარ საფუძველს უქმნის ინოვაციებისა და სამეწარმეო გარემოს განვითარებას. მიუხედავად იმისა, რომ სტარტაპ ეკოსისტემა სულ 10 წლის წინ ჩამოყალიბდა, რამდენიმე ქართული სტარტაპის განსაკუთრებული წარმატება მიუთითებს ქვეყნის ინოვაციური პოტენციალის მაღალ დონეზე.
2023 წლის გლობალური ინოვაციების ინდექსის (GII) ანგარიშის მიხედვით, საქართველო 65-ე ადგილზე დაწინაურდა. ეს პროგრესი ასახავს ეკოსისტემის ხარისხობრივ გაუმჯობესებას, რესურსებზე ხელმისაწვდომობის ზრდას და უფრო ხელსაყრელი ბიზნეს გარემოს შექმნას. 2020 წელს სტარტაპ გენომის შეფასებით საქართველო „აქტივაციის“ ფაზაში შევიდა, თუმცა ბოლო წლების წინსვლამ ქვეყანა „გლობალიზაციის“ ფაზაში გადაიყვანა, რაც განვითარების უფრო მოწინავე ეტაპია.
საქართველოს ინოვაციების განვითარების ძირითად მამოძრავებელ ძალებს წარმოადგენენ სამთავრობო სტრუქტურები, აკადემიური ინსტიტუტები და საერთაშორისო ორგანიზაციები. ქვეყანაში სტარტაპებისთვის ყველაზე აქტიური სექტორებია ელექტრონული კომერცია, ფინანსური ტექნოლოგიები, ხელოვნური ინტელექტი (AI) და ციფრული პლატფორმები. მიუხედავად მიღწეული პროგრესისა, საქართველოს ინოვაციურ ეკოსისტემას კვლავ მნიშვნელოვანი სტრუქტურული და გრძელვადიანი გამოწვევები აქვს, რომლებიც სისტემურ რეფორმებს მოითხოვს.
საქართველოში EU4Innovation East პროექტის აქტივობები მოიცავს ეკოსისტემის მოთამაშეების ცნობიერების ამაღლებას, სტარტაპ დაფინანსების ახალი მექანიზმების შექმნას და ევროპის ეკოსისტემასთან კავშირების გაძლიერებას. გრძელვადიან პერსპექტივაში, ჩვენი მიზანია ხელი შევუწყოთ ადგილობრივი ინოვაციური ეკოსისტემის კონკურენტუნარიანობის ამაღლებას და საქართველოს მყარ პოზიციონირებას გლობალური ინოვაციების ღირებულებათა ჯაჭვში.
